საქართველოს ელჩმა, როლანდ ბერიძემ (რეზიდენციით ქ. პრეტორია), რწმუნებათა სიგელები გადასცა ანგოლას რესპუბლიკის პრეზიდენტს ბატონ ჟოაო ლორენცოს
2023 წლის 13 ნოემბერს, საქართველოს ელჩმა, როლანდ ბერიძემ (რეზიდენციით ქ. პრეტორია), რწმუნებათა სიგელები გადასცა ანგოლას რესპუბლიკის პრეზიდენტს ბატონ ჟოაო ლორენცოს. ცერემონიალის ფარგლებში, გაიმართა ელჩისა და პრეზიდენტის ხანმოკლე პირისპირ შეხვედრა, რომლის დროსაც, მხარეებმა იმსჯელეს ორ ქვეყანას შორის ორმხრივ და მრავალმხრივ ფორმატებში ურთიერთობების გაღრმავების პერსპექტივებზე.
მხარეებმა აღნიშნეს, რომ ორ ქვეყანას შორის არსებული პარტნიორული ურთიერთობები ეფუძნება საერთაშორისო სამართლის საყოველთაოდ აღიარებული პრინციპების, მათ შორის ქვეყნების ტერიტორიული მთლიანობისა და სუვერენიტეტის პატივისცემას. აღინიშნა, რომ პოლიტიკური მიმართულებით პარტნიორობასთან ერთად, საქართველოსა და ანგოლას გააჩნიათ ეკონომიკური და ბიზნეს თანამშრომლობის დიდი პოტენციალი.
პრეზიდენტმა ლორენცომ განაცხადა, რომ ანგოლა მოწადინებულია გააღრმავოს ურთიერთობები საქართველოსთან და დასძინა, რომ ანგოლა არის და მომავალშიც დარჩება საქართველოს ტერიტორიული მთლიანობისა და სუვერენიტეტის ურყევ მხარდამჭერად.
